Fasl-i sabi‘ der beyan-i resm-i otlak

“Kadimden korunub otlak resmin alınugelmiş yaylaklar ki örf-i sultanide deftere kayd olunmuştur anı alalar ve anlarun ma‘adası çayırlardan ve kayırlardan ba‘zı mevazi‘de haymane tayifesine yürüge ve şehirlüye ve kura halkına örü kayd olunmuştur ve ba‘zı mevazi‘de ve dahl sipahilere tımar kayd olmuştur ve ba‘zı dahı halı ve haric-i defterdir anların gibi yerlerden ‘ummal tayifesi ve sipahi otlak resmin almak muhalif-i kanundur heman resm-i agnam alına.

Ve resm-i otlak dahı olan yerlerde ‘adet-i kadim üzre her sürüden bir orta koyundur ve haricden sancaga gelen koyundan resm-i otlak mirlivadar içün ve yahud sahib-i tımar içün a‘la sürüden bir koyun ki bahası yigirmi akçe ola mutavassıt sürüden bir koyun ki bahası on akçe ola ve denadan kezalik ve-l-hasıl yigirmiden artık olmak kanuna muhaliftir alınmaya.

Ve resm-i otlak dahi koyun yürüdügü yere göre olur sahibi oturdugu yere göre degildir ve bir tımarda sipahi mütemekkin olub koyunu olsa veya piyade ve müsellem tayifesinin agnamı olsa anların gibiden sahib-i tımar resm-i otlak taleb itmeye meger ki üzerine hasıl baglanmış ola ve dahi yürük tayifesinden bir kimesne bir tımarda yer zira‘at itse ve bagı bagçesi olsa sahib-i tımara resm-i otlak vire amma kışlak resmin virmeye ve haricden re‘ayadan bir kimesne bir tımarda koyun kosa ve yürütse veya ortaga virse anların gibiden dahi otlak (resmi) taleb olunmaz meger ki yine hasıl kayd olunmuş ola.”

(1.Selim Kanunnameleri, Tirana ve Leningrad nüshaları, 1512-1520, TTK yayınları, 1995)