Fasl-i sadis der beyan-i resm-i agnam

“Yerlüde ve yürükde iki koyuna bir akçe almak kanundır ve dahi koyunla kuzu bir sayılmak dahi ba‘zı yerlerde kanundır ve koyun bi-t-tamam dölün döküb ayırtlaşdıklarından sonra mah-i abrilde alınur ve ba‘zı yerde mayısda alınur ve koyunu olmayan yürükden resm-i kara diyü on iki akçe alınur ve dahi yürügün koyunu yigirmiden akall olsa ana dahi kara derler koyun resmin almayalar heman on iki akçe resm-i kara alınur ve yürük sipahi yerin tutsa ‘öşr salarlık vürdüginden sonra resm-i boyunduruk on iki akçesin alalar ziyade almayalar ve yürük resmi eva’il kuzu katılacak alınur imiş haliyen abril ayında alınmak mukarrerdir ve Kara koyunluda kara koyunlu dimekle meşhur padişahımız hazretlerine müte‘allik yürügan vardır resm-i agnamları hassa-i hümayun içün alınur ve defter-i ‘atikde şöylece meşruhdır ki şol kimesnenin kesm-i ganemi otuz üçden ziyade ola onlardan iki koyuna bir akçe alına ziyade ve noksan alınmaya ve şunlar ki koyunu yoktur on ikişer akçe alına ve fakir olanlar altışar akçe vire dahi bir kimesne koyun ‘adetin alacak zamana karib koyun alsa vaktinde resmi andan alalar alalı bir aydır dedigüne amel itmeyeler ve kassabların ve celebkeşlerin ellerinde olan koyunların abril ayında adet-i agnam alundugına hüccetleri bulunmaz ise resm taleb oluna ve eger vech-i meşruh üzerine hüccetleri bulunmaz ise satun aldukları yeri buluvireler anlardan alına ve illa ellerinde bulunan kimesnelerden alına ve dahi celebkeşlere tenbih oluna kim abril ayında alalar ve illa adet-i agnam sonradan alurlar dinile.”

(1.Selim Kanunnameleri, Tirana ve Leningrad nüshaları, 1512-1520, TTK yayınları, 1995)