Fasl-i der beyan-i resm-i ‘arusane

“Ve dahi cihazlu kızdan altmış ve ‘avretden kırk akçe alına ba‘zı yerde avretden otuz bakireden altmış akçe alınur fakire avretden nışf resm-i ‘adete alınur ve mutavassıt-ül-hal olandan beyne beynedir ve bakire kızın resm-i arusanesi babasına tabi‘dir ya‘ni babasının sipahisi alur ne makamda çıkarsa çıksun amma avretde toprak mu‘teberdir kimin timarında nikah olursa resm anundur ve yürük tayifesi lamekan oldugu sebebden atasına tabi‘dir eger bakire ve eger şeyyibedir ve eger sipahi tayifesinin kızı çıksa arusanesi subaşılıkda ise subaşının olur ve eger sancak begi yedi altında ise sancakbegi alur ve dahi sancakbegi kızı çıksa resm beglerbeginindir ve beglerbegi kızı çıksa resm hızane-i amireye alınur ve dahi piyade ve müsellem tayifesinin resm-i arusanesi çiftlikleri üzerinde olsun ve re‘aya yerinde olsun sancak beginin resm-i arusanesi çiftlikleri üzerinde olsun ve re‘aya yerinde olsun sancak beginindir ve eger şeyyibe olursa re‘aya gibi topraga tabi‘dir eger kendüsi yayalık çiftligi üzerinde olursa sancak beginindir ve illa sahib-i arzındır ve Hüdavendigar evi olan yürükler hızane-i amireye alınur ve dahi bir kimesne avretine talak virüb yine nikahlansa resm-i nikah alınur resm-i gerdek alınmaz ve dahi bir kimesne cariyesini abdına nikah itse resm-i nikah ve resm-i gerdek alınmaya ve dahi bir kimesne cariyesini azadlu kimesneye nikah itse bakire ise nışf-i resm-i hürre-i bakire ve eger şeyyibe ise nışf-i resm-i hürre-i şeyyibe (alına)."

(1.Selim Kanunnameleri, Tirana ve Leningrad nüshaları, 1512-1520, TTK yayınları, 1995)